२६ माघ, काठमाडौं । नेपाल टेलिकमले आफ्ना जीएसएम प्रिपेड सिमकार्ड प्रयोगकर्ताहरूका लागि ग्राहक विवरण अनलाइनमार्फत अद्यावधिक गर्न सकिने सुविधा देशभरका कार्यालयहरूमा विस्तार गरेको छ।

यसअघि पुस २२ गतेदेखि काठमाडौंको सुन्धारास्थित दूरसञ्चार कार्यालयबाट परीक्षणका रूपमा सुरु गरिएको यो सेवा कम्पनीको २२औं वार्षिकोत्सवको अवसरमा माघ २२ गतेदेखि देशभरका सबै कार्यालयहरूबाट उपलब्ध गराउन थालिएको हो।

यो सुविधाअन्तर्गत ग्राहकहरूले आफ्नो नाम वा अन्य व्यक्तिगत विवरण सच्याउनुपर्ने भएमा अब आफैं अनलाइनमार्फत विवरण भरेर अपडेट गर्न सक्ने व्यवस्था मिलाइएको छ।

यसका लागि ग्राहकहरूले टेलिकमको ‘कस्टमर लगइन पोर्टल’ प्रयोग गर्नुपर्ने हुन्छ, जहाँ मोबाइल नम्बरमा आउने ओटीपी ९इत्ए० मार्फत प्रमाणीकरण गरी आफ्नो विवरण, ठेगाना, र परिचयपत्रका फोटोहरू अपलोड गर्न सकिन्छ।

टेलिकमका अनुसार यो प्रणालीको प्रयोगले ग्राहकहरूको समय र श्रम बचत हुनुका साथै सेवा थप ग्राहकमैत्री, सरल र प्रभावकारी हुनेछ। पहिलो चरणमा क्यूआर कोड र वेबसाइटमार्फत उपलब्ध गराइएको यो सेवालाई आगामी दिनमा नेपाल टेलिकमको मोबाइल एपमा पनि पूर्ण रूपमा समावेश गर्ने कम्पनीको योजना रहेको छ।

यस डिजिटल रूपान्तरणले कागजविहीन कार्य प्रणालीलाई प्रोत्साहन गर्ने र डाटा अद्यावधिक प्रक्रियालाई थप व्यवस्थित बनाउने अपेक्षा गरिएको छ।